24 oer van Le Mans
Dit artikel is gesjreve (of begós) in 't Oeals. Laes hie wie v'r mit de versjillende saorte Limburgs ómgaon.
De 24 oer van Le Mans is eine race dae sins 1923 op 't 13,65 km lang 'Circuit de la Sarthe' circuit in Le Mans (Frankriek) weurdj gehaaje. De naam van 't circuit kumptj van'ne rivier de Sarthe, wo Le Mans aan ligk. Tiedes de race is 't de bedoeling om in 24 oer tied zo väöl meugelik rundjes te rieje. De race vindj eeder jaor in 't tweede wiekend van juni plaats.
De 24 oer van Le Mans is de aajste en grotste autorace ter waereld. 't Is, saame mit de Grand Prix van Monaco en'ne Indianapolis 500, de beroemdste race van 't jaor. D'r komme zo'n 300.000 toesjouwers op aaf, d'r zeen 2500 journaliste aanwezig en bienao 200 miljoen miense volge de race op TV. Daomit is de 24 oer van Le Mans ouch 't grotste jaorlikse sjportevenement van Europa.
Taegewoordig mot de winnaar ruum 5000 kilomaeter afligke. D'r weurdj dan dus in 24 oer ein compleet Formule 1 seizoen gereeje. Daoveur is ein topsjnelheid van 350 km/h en ein gemiddeldje sjnelheid van 220 km/h noodzakelik. In 2006 won veur 't eers eine auto mit dieselmotor, de Audi R10 LM1.
Veur de race begintj
[bewirk | brón bewèrke]In totaal sjtarte d'r 50 auto's, in versjillendje klasse, eedere waage weurdj besjtuurdj door 3 coureurs. De auto's waere geselecteerdj oet 't väöl groter aantal ingesjreeve auto's. De door de organisasie oetgeneudigdje teams kriege op'pe eerste zondaag van mei de kans om eine daag op 't circuit te teste. Op'pe maondaag en dinsdaag veur de race in juni waere alle auto's gekeurdj op ein plein in 't aad centrum van'ne sjtad. Net es de test in mei trektj de keuring teendoezendje toesjouwers. Op woensdaag en donderdaag waere van 7 oer 's aoves toet middernach de kwalificatiesessies verreeje, die de sjtartopsjtelling bepaale. Op de vriedaag, eine rösdaag, waere alle coureurs aan 't enj van'ne middig op aaj auto's door 't centrum van'ne sjtad gereeje. Dees parade trektj ruum 60.000 miense. Nao eine korte warm-up op zaoterdaagmorge en väöl festiviteite op'pe starting grid, geitj de 24 oer van Le Mans tradisioneel om 16.00 oer van sjtart.
Race klasse
[bewirk | brón bewèrke]
D'r doon veer versjillendje klasse mit aan'ne 24 oer van Le Mans. Op dit moment waere de regels m.b.t. de klasse gewiezigdj. Om deze euvergangk soepel te laote verloupe geldj d'r op dit moment ein euvergangs reglement, mit hiej in de volgendje klasse:
- LMP1
- Dit is de keuningsklasse in'ne 24 oer van Le Mans. Alle auto's oet de aaj LMP900 en LMGTP klasse rieje noe in dees nuuj klasse, dees auto's waege minimaal 900 kg. De maximum maote van'ne auto zeen (L x B x H): 465 x 200 x 103 cm. De atmosferisje motor haetj eine maximum inhoud van 6 liter, de turbo motors höbbe eine maximale inhoud van 4 liter. Ouch de auto's oet de aaj LMP675 klasse zitte noe in'ne LMP1 klasse. De LMP675 auto's zeen waal langzamer den LMP900 auto's. In 2006 deene alle auto's te voldoon aan 't nuuj LMP1 reglement. Veurbeeldje: Audi R8, Dome, Pescarolo
- LMP2
- De LMP2 klasse is de klasse veur de 'goojekoupere' prototype's, mit ein minimum gewich van 750 kg. De toegesjtaone motors höbbe eine inhoud van 3,4 liter veur de atmosferische motors en eine maximum inhoud van 2 liter veur de turbo motors. Veurbeeldje: In 2004 voldeej allein Lola-Judd nummer 32 aan'ne regels veur LMP2.
- LM GTS
- Dees auto's komme qua regels euverein mit de GT1 auto's oet de FIA GT klasse. D'r zeen sjlechs twee versjille: de achtervleugel is kleiner en 't gebroek van carbon remme is toegesjtange. De motorinhoud is maximaal 8 liter veur atmosferische motors, 4 liter voor turbo motors. 't Gewich van'ne auto's is minimaal 1100 kg. Veurbeeldje: Ferrari 550 Maranello, Corvette C6-R,Aston Martin DBR9
- LM GT
- Dit zeen de GT2 auto's oet de FIA-GT klasse. 't Minimum gewich is 1100 kg, de eise aan'ne motors zeen 'tzelfdje es in'ne LM GTS klasse. Veurbeeldje: Porsche 911 GT3, Ferrari 360 Modena, Panoz Esperante GTLM & Spyker C8 Spyder GT2R.
De veer klasse rieje geliektiejig de race. Dit geuftj väöl inhaolacties, waat leuk is veur 't publiek langs de baan.
